ഉണ്ണി മുകുന്ദൻ നായകനായ മാളികപ്പുറം എന്ന സൂപ്പർ ഹിറ്റ് ചിത്രത്തിലൂടെ പ്രേക്ഷകശ്രദ്ധ നേടിയ ബാലതാരമാണ് ദേവനന്ദ. ഇപ്പോഴിതാ സാമൂഹ്യ മാധ്യമങ്ങളില്‍ സൈബർ ആക്രമണം നേരിടുകയാണെന്ന് പരാതിയുമായി രംഗത്തെത്തിയിരിക്കുകയാണ് ദേവനന്ദയും കുടുംബവും. ചില ഓൺലൈൻ മീഡിയകൾക്കെതിരെ സംഭവത്തിൽ ദേവനന്ദയുടെ അച്ഛൻ ജിബിൻ, എറണാകുളം സൈബർ പൊലീസിൽ പരാതി നൽകി.
‘ഗൂ’ എന്ന പുതിയ ചിത്രത്തിനായി ദേവനന്ദ നൽകിയ അഭിമുഖത്തിലെ ഭാഗങ്ങൾ കട്ട് ചെയ്ത് അനുവാദമില്ലാതെ മോശമായ രീതിയിൽ പ്രചരിപ്പിച്ചതായാണ് പരാതി. മനപ്പൂർവം അപമാനിക്കുക എന്ന ലക്ഷ്യത്തോടെയാണ് കണ്ടന്റ് ക്രിയേറ്റേഴ്സ് എന്ന് അവകാശപ്പെടുന്ന ഒരുകൂട്ടം ആളുകൾ സോഷ്യൽ മീഡിയയിലൂടെ പ്രചാരണം നടത്തിയതെന്നും, 10 വയസുകാരിയായ മകൾക്ക് ഇത് മാനസികമായി ബുദ്ധിമുട്ടുണ്ടാക്കിയെന്നും പരാതിയിൽ പറയുന്നു.
ഓൺലൈൻ ചാനലിന് നൽകിയ അഭിമുഖത്തിൽ, ‘പുതിയ തലമുറയിലെ കുട്ടികൾ ഒരുപാടു മാറിയെന്നും ക്യൂട്ട്‍നെസ് നോക്കി നിൽക്കുന്നവരല്ലെന്നു’മുളള ദേവാനന്ദയുടെ പരാമർശമാണ് വ്യാപക വിമർശനത്തിനും ട്രോളുകൾക്കും കാരണമായത്. ഇതോടെ ദേവനന്ദയെ അനുകൂലിച്ചും പ്രതികൂലിച്ചും നിരവധി പേരാണ് സോഷ്യൽ മീഡിയയിലൂടെ രംഗത്തെത്തിയത്. ഇതിനെതിരെയാണ് പിതാവ് പരാതി നൽകിയത്.