നോർത്ത് സെൻട്രൽ നൈജീരിയയിൽ സ്കൂൾ തകർന്നുവീണ് 22 വിദ്യാർത്ഥികൾ മരിച്ചു, കെട്ടിടട്ടിൻ്റെ അവശിഷ്ടങ്ങൾക്കിടയിൽ കുടുങ്ങിയ 100 ലധികം ആളുകൾക്കായി രക്ഷാപ്രവർത്തനങ്ങൾ പുരോഗമിക്കുകയാണ്.
15 വയസോ അതിൽ താഴെയോ പ്രായമുള്ള വിദ്യാർത്ഥികൾ ക്ലാസുകളിലേക്ക് എത്തിയതിന് തൊട്ടുപിന്നാലെ പ്ലാറ്റോ സ്റ്റേറ്റിലെ ബുസാ ബുജി കമ്മ്യൂണിറ്റിയിലെ സെയിൻ്റ്സ് അക്കാദമി സ്കൂൾ തകർന്നുവീഴുകയായിരുന്നു.
154 വിദ്യാർത്ഥികൾ ആദ്യം അവശിഷ്ടങ്ങൾക്കിടയിൽ കുടുങ്ങിയിരുന്നു, എന്നാൽ അവരിൽ 132 പേരെ രക്ഷപ്പെടുത്തിയതായും വിവിധ ആശുപത്രികളിൽ പരിക്കേറ്റ് ചികിത്സയിലാണെന്നും പോലീസ് വക്താവ് ആൽഫ്രഡ് അലബോ പിന്നീട് പറഞ്ഞു. 22 വിദ്യാർഥികൾ മരിച്ചതായും അദ്ദേഹം അറിയിച്ചു.
സ്കൂൾ തകർന്ന ഉടൻ തന്നെ രക്ഷാപ്രവർത്തകരെയും ആരോഗ്യ പ്രവർത്തകരെയും സുരക്ഷാ സേനയെയും സംഭവസ്ഥലത്ത് വിന്യസിച്ചിട്ടുണ്ടെന്നും കുടുങ്ങിയ വിദ്യാർത്ഥികൾക്കായി തിരച്ചിൽ ആരംഭിച്ചതായും നൈജീരിയയിലെ നാഷണൽ എമർജൻസി മാനേജ്‌മെൻ്റ് ഏജൻസി അറിയിച്ചു.
“വേഗത്തിലുള്ള വൈദ്യസഹായം ഉറപ്പാക്കുന്നതിന്, ഡോക്യുമെൻ്റേഷനോ പണമടയ്ക്കാതെയോ ചികിത്സയ്ക്ക് മുൻഗണന നൽകാൻ സർക്കാർ ആശുപത്രികൾക്ക് നിർദ്ദേശം നൽകിയിട്ടുണ്ട്,” പ്ലാറ്റോ സ്റ്റേറ്റ് ഇൻഫർമേഷൻ കമ്മീഷണർ മൂസ ആഷോംസ് പ്രസ്താവനയിൽ പറഞ്ഞു.
സ്‌കൂളിൻ്റെ ദുർബലമായ ഘടനയും നദീതീരത്തുള്ള സ്ഥലവുമാണ് ദുരന്തത്തിന് കാരണമെന്ന് സംസ്ഥാന സർക്കാർ ആരോപിച്ചു. സമാനമായ പ്രശ്‌നങ്ങൾ നേരിടുന്ന സ്‌കൂളുകൾ അടച്ചുപൂട്ടാൻ ആവശ്യപ്പെട്ടു.
ആഫ്രിക്കയിലെ ഏറ്റവും ജനസംഖ്യയുള്ള രാജ്യമായ നൈജീരിയയിൽ കെട്ടിടങ്ങൾ തകരുന്നത് സാധാരണമായിക്കൊണ്ടിരിക്കുകയാണ് കെട്ടിട സുരക്ഷാ ചട്ടങ്ങൾ പാലിക്കാത്തതും അറ്റകുറ്റപ്പണികൾ നടത്താത്തതുമാണ് ഇത്തരം ദുരന്തങ്ങൾക്ക് കാരണമായി അധികാരികൾ പലപ്പോഴും കുറ്റപ്പെടുത്തുന്നത്.