ലോകത്തിലെ ഏറ്റവും ചെലവ് കുറഞ്ഞ രണ്ടാമത്തെ പാസ്‌പോർട്ടായി ഇന്ത്യൻ പാസ്‌പോർട്ട്. വാർഷിക സാധുതയുടെ കാര്യത്തിൽ ലോകത്തിലെ ഏറ്റവും ചെലവ് കുറഞ്ഞ പാസ്‌പോർട്ടാണെന്നും(World’s cheapest passport) ഓസ്‌ട്രേലിയൻ സ്ഥാപനമായ കംപെയർ ദ മാർക്കറ്റ് എ.യു നടത്തിയ പഠനത്തിൽ പറയുന്നു. യുഎഇ പാസ്‌പോർട്ടിനാണ് ഒന്നാം സ്ഥാനം. ലോകത്തെ വിവിധ രാജ്യങ്ങളുടെ പാസ്‌പോർട്ടിൻ്റെ വില താരതമ്യം ചെയ്തിട്ടുണ്ട്. ഒരു രാജ്യത്തിൻ്റെ പാസ്‌പോർട്ട് ഉപയോഗിച്ച് ഒരാൾക്ക് എത്ര രാജ്യങ്ങളിലേക്ക് വിസ ഫ്രീ എൻട്രി ലഭിക്കും എന്നതിൻ്റെ താരതമ്യവും പഠനവിധേയമാക്കിയിട്ടുണ്ട്.
ഓസ്‌ട്രേലിയൻ സ്ഥാപനം പുറത്തിറക്കിയ പത്രക്കുറിപ്പ് പ്രകാരം, 10 വർഷത്തെ സാധുതയുള്ള ഒരു ഇന്ത്യൻ പാസ്‌പോർട്ടിൻ്റെ വില $18.07 (1,505 രൂപ) ആണ്. അതേസമയം 5 വർഷത്തെ പാസ്‌പോർട്ടിന് യുഎഇ ഈടാക്കുന്നത് $17.70 (1,474 രൂപ) ആണ്.
ഇന്ത്യൻ പാസ്‌പോർട്ട് പൊതുവെ വിലകുറഞ്ഞതാണ്. എന്നാൽ ഇത് പരിമിതമായ രാജ്യങ്ങളിലേക്ക് മാത്രമേ വിസ രഹിത പ്രവേശനം നൽകൂ. ഇന്ത്യൻ പാസ്‌പോർട്ട് ഉടമകൾക്ക് 62 രാജ്യങ്ങളിൽ മാത്രമേ വിസയില്ലാതെ പ്രവേശിക്കാൻ കഴിയൂ. ഓസ്‌ട്രേലിയ, അമേരിക്ക, കാനഡ തുടങ്ങിയ രാജ്യങ്ങളിൽ നിന്ന് വ്യത്യസ്തമാണ് ഇത്. ഈ രാജ്യങ്ങൾക്ക് വിലകൂടിയ പാസ്‌പോർട്ടുകളുണ്ടെങ്കിലും കൂടുതൽ രാജ്യങ്ങളിലേക്ക് വിസ രഹിത പ്രവേശനം വാഗ്ദാനം ചെയ്യുന്നു. പഠനത്തിൽ, ലോകത്തിലെ ഏറ്റവും വില കുറഞ്ഞ പാസ്‌പോർട്ടായാലും വിസ രഹിത ആക്‌സസ് ആയാലും എല്ലാ കാര്യങ്ങളിലും യുഎഇ പാസ്‌പോർട്ട് ഒന്നാം സ്ഥാനത്താണ്.

വാർഷിക ചെലവിൻ്റെ അടിസ്ഥാനത്തിൽ..

വാർഷിക ചെലവിൻ്റെ കാര്യത്തിൽ ഏറ്റവും വിലകുറഞ്ഞത് ഇന്ത്യൻ പാസ്‌പോർട്ടാണെന്ന് പഠനം പറയുന്നു. ഇന്ത്യൻ പാസ്‌പോർട്ടിൻ്റെ ഒരു വർഷത്തെ സാധുതയ്ക്ക് ഒരാൾ 1.81 ഡോളർ (150 രൂപ) മാത്രം നൽകിയാൽ മതി. ദക്ഷിണാഫ്രിക്കയും ($3.05, 254 രൂപ), കെനിയയും ($3.09, 257 രൂപ) ഉൾപ്പെടെയുള്ള രാജ്യങ്ങളാണ് ഈ പട്ടികയിൽ പിന്നാലെയുള്ളത്.