യുഎസിലെ കാലിഫോർണിയയിലെ പ്ലസന്റണിലുണ്ടായ കാറപകടത്തിൽ നാലംഗ മലയാളി കുടുംബത്തിന് ദാരുണാന്ത്യം. തരുൺ ജോർജ്, ഭാര്യ, രണ്ടു കുട്ടികൾ എന്നിവരാണ് മരിച്ചത്. സ്റ്റോൺറിഡ്ജ് ഡ്രൈവിന് സമീപമുള്ള ഫൂത്ത്ഹിൽ റോഡിൽ പ്രാദേശിക സമയം ബുധനാഴ്ച രാത്രി ഒമ്പത് മണിക്കായിരുന്നു അപകടം നടന്നത്. ഇവരെ കുറിച്ച് കൂടുതൽ വിവരങ്ങൾ പുറത്ത് വന്നിട്ടില്ല.
അപകടത്തിനു കാരണം അമിതവേഗമാണെന്നാണ് പൊലീസ് സംശയിക്കുന്നത്. അപകടത്തിനു പിന്നാലെ കാറിൽ തീപിടിച്ചിരുന്നു. പിന്നാലെ കാർ പൂർണമായും കത്തിനശിച്ചു. സംഭവത്തിൽ സമഗ്രമായ അന്വേഷണം നടത്തുകയാണെന്നും കൂടുതൽ വിവരങ്ങൾ ഇപ്പോൾ ലഭ്യമല്ലെന്നും പ്ലസന്റൺ പൊലീസ് അറിയിച്ചു.
കഴിഞ്ഞ ദിവസം ഒമാനിൽ രണ്ട് മലയാളി നഴ്സുമാർ അപകടത്തിൽ മരിച്ചിരുന്നു. കൊല്ലം കൊട്ടിയം സ്വദേശി മാജിദ രതീഷ്, ഇരിങ്ങാലക്കുട സ്വദേശി ഷർജ ഇല്യാസ് എന്നിവരും ഇവർക്കൊപ്പമുണ്ടായിരുന്ന ഈജ്പ്ത് സ്വദേശിയുമാണു മരിച്ചത്.പരുക്കേറ്റ രണ്ട് മലയാളി നഴ്സുമാരിൽ ഒരാളുടെ നില ഗുരുതരമാണ്.
നിസ്‍വ ആശുപത്രിയിലെ ജോലി കഴിഞ്ഞു താമസ സ്ഥലത്തേക്കു നടന്നു പോകവെ മസ്കത്ത്–ഇബ്രി ഹൈവേയിൽ ഉച്ചയ്ക്കാണ് അപകടമുണ്ടായത്. അതിവേഗപാതയിലെ ഡിവൈഡറിനു സമീപം നിൽക്കവെ കൂട്ടിയിടിച്ച 2 കാറുകൾ പാഞ്ഞുകയറുകയായിരുന്നു. ഉടൻ ഇവരെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മാജിദയുടെ ഭർത്താവും മക്കളും അടുത്ത ദിവസം ഒമാനിലേക്കു വരാനിരിക്കെയാണ് അപകടം.