തിരുവനന്തപുരം ചാക്കയില്‍ നിന്ന് കാണാതായ രണ്ടു വയസുകാരിയെ 19 മണിക്കൂറിന് ശേഷം കണ്ടെത്തി. വൈകിട്ട് ഏഴരയോടെ കൊച്ചുവേളി റെയില്‍വെ സ്റ്റേഷന് സമീപത്തുനിന്നുമാണ് കുട്ടിയെ കണ്ടെത്തിയത്. അന്വേഷണം ഊര്‍ജിതമാക്കിയതോടെ ഇന്നലെ രാത്രി കുട്ടിയെ ഓടയില്‍ ഉപേക്ഷിച്ച് പ്രതികള്‍ കടന്നുകളഞ്ഞെന്നാണ് സൂചന. നാട്ടുകാരാണ് കുട്ടിയെ ഉപേക്ഷിച്ച നിലയില്‍ കണ്ടെത്തിയ കാര്യം പൊലീസില്‍ അറിയിച്ചത്. തുടര്‍ന്ന് മണ്ണന്തല എസ്എച്ച്ഒ ബിജു കുറുപ്പിന്റെ നേതൃത്വത്തിലുള്ള സംഘം കുട്ടിയെ ഏറ്റെടുത്ത് ആശുപത്രിയിലെത്തിക്കുകയായിരുന്നു. ജനറല്‍ ആശുപത്രിയില്‍ നടന്ന പ്രാഥമിക പരിശോധനയില്‍ കുട്ടിക്ക് മറ്റു ആരോഗ്യപ്രശ്‌നങ്ങളില്ലെന്ന് ഡോക്ടര്‍മാര്‍ അറിയിച്ചു. എസ്എടി ആശുപത്രിയിലേക്ക് കുട്ടിയെ മാറ്റും. അതേസമയം പ്രതികളെ അധികം വൈകാതെ കണ്ടെത്താനാകുമെന്ന പ്രതീക്ഷയിലാണ് പൊലീസ്. അന്വേഷണ സംഘത്തിന് പ്രതിയെക്കുറിച്ചുള്ള വിവരം ലഭിച്ചിട്ടുണ്ടെന്ന സൂചനകളും പുറത്തുവരുന്നുണ്ട്.
പ്രതികള്‍ക്കായി സിസിടിവി ദൃശ്യം കേന്ദ്രീകരിച്ചാണ് അന്വേഷണം നടക്കുന്നത്. ബ്രഹ്‌മോസിന് സമീപത്ത് നിന്ന് ലഭിച്ച സിസിടിവി ദൃശ്യത്തില്‍ രാത്രി 12ന് ശേഷം രണ്ട് പേര്‍ ബൈക്കില്‍ പോകുന്നത് കാണാം. ഇവര്‍ക്കിടയില്‍ കുട്ടി ഉള്ളതായി നാട്ടുകാര്‍ക്ക് അടക്കം സംശയമുണ്ടായിരുന്നു. ഇത് കേന്ദ്രീകരിച്ച് അന്വേഷണം നടക്കുന്നതിനിടെ സമൂഹമാധ്യമങ്ങളിലൂടെയും മറ്റ് മാധ്യമങ്ങളിലൂടെയും കുട്ടിയുടെ ചിത്രങ്ങളടക്കം പ്രചരിപ്പിച്ചിരുന്നു. തലസ്ഥാനത്ത് മുഴുവനായി പൊലീസ് നടത്തിയത് പഴുതടച്ച അന്വേഷണമായിരുന്നു. പൊലീസ് പരിശോധന ശക്തമായതോടെ കുട്ടിയെ പ്രതികള്‍ ഉപേക്ഷിച്ച് കടന്നുകളഞ്ഞതായിരിക്കാമെന്നാണ് പ്രദേശവാസികളും പറയുന്നത്.
ഇന്നലെ രാത്രി 12 മണിയോടെയാണ് പേട്ട ഓള്‍സെയിന്റ്‌സ് കോളേജിന് സമീപത്തെ റെയില്‍വേ ട്രാക്കിനരികെ ഉറങ്ങിക്കിടന്ന കുട്ടിയെ കാണാതായത്.