പൊതു-സ്വകാര്യ പങ്കാളിത്ത (പിപിപി) കോളേജുകളിൽ നിന്ന് ബിരുദം നേടുന്ന രാജ്യാന്തര വിദ്യാർത്ഥികൾക്ക് ഇന്ന് മുതൽ ബിരുദാനന്തര ബിരുദ വർക്ക് പെർമിറ്റിന് (PGWP) അർഹതയുണ്ടാകില്ലെന്ന് കാനഡ. പുതുക്കിയ യോഗ്യതാ മാനദണ്ഡം പ്രാബല്യത്തിൽ വന്ന പശ്ചാതലത്തിൽ ആണ് ഇത്.
പൊതു-സ്വകാര്യ കരിക്കുലം ലൈസൻസിങ് ക്രമീകരണത്തിലൂടെ വിതരണം ചെയ്യുന്ന കോളേജ് പ്രോഗ്രാമുകളിൽ നിന്നുള്ള ബിരുദധാരികൾ, പുതുക്കിയ നിയമങ്ങൾ പ്രകാരം വർക്ക് പെർമിറ്റിന് യോഗ്യത നേടില്ല എന്നതാണ് പ്രധാന വ്യവസ്ഥ. അതായത്, മേയ് 15നോ അതിനു ശേഷമോ അത്തരം പ്രോഗ്രാമുകളിൽ ചേരുന്ന വിദ്യാർഥികൾക്ക് അവരുടെ പഠനം പൂർത്തിയാകുമ്പോൾ വർക്ക്
പെർമിറ്റിന് അർഹതയുണ്ടാകില്ല. എന്നാൽ മെയ് 15-ന് മുമ്പ്, ഓരോ പ്രവിശ്യയിലെയും പൊതു-സ്വകാര്യ പങ്കാളിത്ത കോളേജുകളിൽ വിദ്യാർത്ഥികൾ ചേർന്നിട്ടുണ്ടെങ്കിൽ, അവർക്ക് PGWP-ക്ക് യോഗ്യത ലഭിക്കും.
2023 ഫെബ്രുവരി 1-ന് ശേഷമാണ് ഈ പ്രോഗ്രാമുകളിലൊന്ന് ആരംഭിച്ചതെങ്കിൽ രാജ്യാന്തര വിദ്യാർത്ഥികൾക്ക് പുതിയ PGWP- ക്ക് അപേക്ഷിക്കാൻ കഴിയില്ല. തൊഴിലുടമയുടെ അംഗീകൃത ലേബർ മാർക്കറ്റ് ഇംപാക്ട് അസസ്മെന്റിന്റെ പിന്തുണയുള്ള വർക്ക് പെർമിറ്റിന്
വിദ്യാർഥികൾക്ക് തുടർന്നും അപേക്ഷിക്കാവുന്നതാണ്.