യോ​ഗ്യരായ കനേഡിയൻ പൗരന്മാർക്കുള്ള അഡ്വാൻസ്‌ഡ് കാനഡ വർക്കേഴ്സ് ബെനിഫിറ്റ് പേയ്‌മെന്റ് ജനുവരി 12-ന് വിതരണം ചെയ്യുമെന്ന് കാനഡ റവന്യൂ ഏജൻസി (CRA). കുറഞ്ഞ വരുമാനമുള്ള യോഗ്യരായ തൊഴിലാളികൾക്കും അവരുടെ കുടുംബങ്ങൾക്കും സാമ്പത്തിക സഹായം നൽകുന്നതിനായി സൃഷ്ടിച്ച പദ്ധതിയാണ് അഡ്വാൻസ്‌ഡ് കാനഡ വർക്കേഴ്സ് ബെനിഫിറ്റ് പേയ്‌മെന്റ്. വരുമാനത്തെ ആശ്രയിച്ച്, യോഗ്യരായ വ്യക്തികൾക്ക് 1,518 ഡോളർ വരെയും കുടുംബങ്ങൾക്ക് 2,616 ഡോളർ വരെയും ലഭിക്കും. പേയ്‌മെന്റുകളെ മൂന്ന് ത്രൈമാസ കാനഡ വർക്കേഴ്‌സ് ബെനിഫിറ്റ് പേയ്‌മെന്റുകളായി തിരിച്ചിട്ടുണ്ട്. ACWB അതിന്റെ ആദ്യ ത്രൈമാസ പേയ്‌മെന്റ് ജൂലൈ 28-നും രണ്ടാമത്തെ പേയ്‌മെന്റ് ഒക്ടോബർ 12-നും വിതരണം ചെയ്തിരുന്നു. മൂന്നാമത്തെ പേയ്‌മെന്റ് ജനുവരി 12-ന് വിതരണം ചെയ്യും. സാധാരണയായി, ജനുവരി 12-ന്, യോഗ്യതയുള്ള കുടുംബങ്ങൾക്കോ ​​വ്യക്തികൾക്കോ ​​ പേയ്മെന്റ് ലഭിക്കും; എന്നാൽ CRA-യുമായി ലിങ്ക് ചെയ്‌ത ബാങ്ക് അക്കൗണ്ടിൽ പണം എത്താൻ 10 പ്രവൃത്തി ദിവസങ്ങൾ വരെ എടുത്തേക്കാം.