തുടര്‍ച്ചയായി രണ്ടാം ദിവസവും കാനഡയിലുടനീളമുള്ള സ്ഥാപനങ്ങള്‍ക്ക് നേരെ വീണ്ടും ബോംബ് ഭീഷണി. വ്യാഴാഴ്ച സിനഗോഗുകള്‍, മ്യൂസിയങ്ങള്‍, മാളുകള്‍ എന്നിവയ്ക്കെതിരായി പുതിയ ഭീഷണി റിപ്പോര്‍ട്ട് ചെയ്തിട്ടുണ്ട്. സംഭവത്തില്‍ അന്വേഷണം ഊര്‍ജിതമാക്കിയതായി ആര്‍സിഎംപി അന്വേഷണ ഉദ്യോഗസ്ഥര്‍ പറഞ്ഞു. സംശയിക്കപ്പെടുന്ന വ്യക്തികളെ തിരിച്ചറിയാനും അവരുടെ പ്രവര്‍ത്തനങ്ങള്‍ തടയാനും ആഭ്യന്തര, അന്തര്‍ദേശീയ പോലീസ് സേനകളുമായി സംയുക്തമായി പ്രവര്‍ത്തിച്ചുവരികയാണെന്ന് ആര്‍സിഎംപി വ്യക്തമാക്കി.
ബുധനാഴ്ച ജൂത സ്ഥാപനങ്ങളുമായുള്ള സ്ഥാപനങ്ങള്‍ക്ക് നേരെ ബോംബ് ഭീഷണി അടങ്ങിയ ഇ മെയില്‍ സന്ദേശം ലഭിച്ചിരുന്നു. ഓട്ടവയിലെ ആശുപത്രികള്‍ക്ക് നേരെയും ഭീഷണി ഉയര്‍ന്നിരുന്നു. ഇന്ത്യയിലും സമാനമായ രീതിയില്‍ ആശുപത്രികള്‍, സര്‍ക്കാര്‍ സ്ഥാപനങ്ങള്‍ എന്നിവയ്ക്ക് നേരെ ബോംബ് ഭീഷണി ഉയര്‍ന്നതായി റിപ്പോര്‍ട്ടുകളുണ്ട്.
