ലിബറൽ സർക്കാരിനെ താഴെയിറക്കാനുള്ള ശ്രമങ്ങൾ ന്യൂ ഡെമോക്രാറ്റിക് പാർട്ടി നേതാവ് തള്ളിക്കളഞ്ഞതോടെ കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ രാഷ്ട്രീയ ഭാവി സുരക്ഷിതത്വത്തിലെന്ന് റിപോർട്ടുകൾ. ഒമ്പത് വർഷമായി പ്രധാനമന്ത്രി കസേരയിലിരിക്കുന്ന ട്രൂഡോയെ താഴെയിറക്കാനാണ് ഏറ്റവും വലിയ രണ്ട് പ്രതിപക്ഷ പാർട്ടികളായ കൺസർവേറ്റീവുകളും ബ്ലോക്ക് ക്യൂബെക്കോയിസും ലക്ഷ്യമിടുന്നത്. വിജയിക്കാൻ, അവർക്ക് ന്യൂ ഡെമോക്രാറ്റുകളുടെ പിന്തുണ ആവശ്യമാണ്. എന്നാൽ ഈ ആശയത്തിൽ തനിക്ക് താൽപ്പര്യമില്ലെന്ന് കനേഡിയന്‍ സിഖ് നേതാവ്ജഗ്മീത് സിംഗ് പറഞ്ഞു.
“ഞങ്ങൾ എപ്പോൾ തിരഞ്ഞെടുപ്പ് ആരംഭിക്കണമെന്ന് തീരുമാനിക്കാൻ ഞാൻ ബ്ലോക്കിനെയോ, കൺസർവേറ്റീവുകളെയോ അനുവദിക്കില്ല. ഞാൻ അവരുടെ കളികൾ കളിക്കാൻ പോകുന്നില്ല”- അദ്ദേഹം മാധ്യമപ്രവർത്തകരോട് പറഞ്ഞു.
2025 ഒക്‌ടോബർ അവസാനത്തോടെ നടക്കേണ്ട തെരഞ്ഞെടുപ്പിൽ ന്യൂ ഡെമോക്രാറ്റുകളും ലിബറലുകളും മോശം പ്രകടനം കാഴ്ചവെക്കുമെന്നാണ് റിപോർട്ടുകൾ കാണിക്കുന്നത്. കൺസർവേറ്റീവുകൾ ഒരു വലിയ വിജയത്തിൻ്റെ പാതയിലാണെന്ന് സർവേകൾ കാണിക്കുന്നു. ട്രൂഡോയെ താഴെയിറക്കാൻ തങ്ങൾ പരമാവധി ശ്രമിക്കുന്നുണ്ടെന്ന് ബ്ലോക്ക് നേതാവ് യെവ്സ്-ഫ്രാങ്കോയിസ് ബ്ലാഞ്ചെറ്റ് ചൊവ്വാഴ്ച പറഞ്ഞു.2013 മുതൽ ലിബറൽ പാർട്ടിനേതാവാണ് ട്രൂഡോ. 2015 മുതൽ കാനഡയുടെ പ്രധാനമന്ത്രിപദത്തിലിരിക്കുന്നു. സഖ്യകക്ഷിയായിരുന്ന ന്യൂ ഡെമോക്രാറ്റിക് പാർട്ടി സെപ്റ്റംബറിൽ പിന്തുണ പിൻവലിച്ചതോടെ ട്രൂഡോയുടേത് ന്യൂനപക്ഷസർക്കാരായി. 338 അംഗ പാർലമെന്റിൽ 153 സീറ്റുകളാണ് ലിബറൽ പാർട്ടിക്കുള്ളത്.