നിലവിലെ ആഗോള സാഹചര്യത്തിൽ ഇന്ത്യ സമർത്ഥമായി കളിച്ചുവെന്നും റഷ്യയുമായി അടുത്ത് നിൽക്കുകയാണെന്നും അമേരിക്കൻ പ്രസിഡൻ്റ് സ്ഥാനാർത്ഥി നിക്കി ഹേലി . നിലവിൽ അമേരിക്കയെ ദുർബലമായാണ് ഇന്ത്യ കാണുന്നത് എന്ന് ഫോക്‌സ് ബിസിനസ് ന്യൂസിന് നൽകിയ അഭിമുഖത്തിൽ നിക്കി ഹേലി പറഞ്ഞതായി വാർത്താ ഏജൻസിയായ പിടിഐ റിപ്പോർട്ട് ചെയ്തു. “എനിക്ക് പറയാനുണ്ട്, ഞാൻ ഇന്ത്യയുമായും ഇടപെട്ടിട്ടുണ്ട്. ഞാൻ മോദിയുമായി സംസാരിച്ചു. ഇന്ത്യ ഞങ്ങളുമായി ഒരു പങ്കാളിയാകാൻ ആഗ്രഹിക്കുന്നു. റഷ്യയുമായി പങ്കാളിയാകാൻ അവർ ആഗ്രഹിക്കുന്നില്ല. ഞങ്ങളെ വിജയിക്കുമെന്ന് ഇന്ത്യ വിശ്വസിക്കുന്നില്ല എന്നതാണ് പ്രശ്‌നം. ഞങ്ങളെ നയിക്കാൻ അവർക്ക് വിശ്വാസമില്ല. ഞങ്ങൾ ദുർബലരാണെന്നാണ് അവർ കരുതുന്നത്. ഇന്ത്യ എല്ലായ്‌പ്പോഴും സമർത്ഥമായി കളിച്ചിട്ടുണ്ട്. അവർ റഷ്യയുമായി അടുത്ത് നിന്നു. കാരണം അവർക്ക് ധാരാളം സൈനിക ഉപകരണങ്ങൾ ലഭിക്കുന്നത് അവിടെ നിന്നാണ്, ”ഹേലി പറഞ്ഞു.
അതേസമയം, നെവാഡ സംസ്ഥാനത്തു നടന്ന റിപ്പബ്ലിക്കൻ തിരഞ്ഞെടുപ്പിൽ നിക്കി ഹേലിക്ക് ദയനീയ പരാജയം. ‌യുഎസ് മുൻ പ്രസിഡന്റും പാർട്ടിയുടെ ജനപ്രിയ സ്ഥാനാർഥിയുമായ ഡോണൾഡ് ട്രംപിന്റെ പേര് ഈ ബാലറ്റിൽ ഇല്ലാതിരുന്നതുകൊണ്ട് അദ്ദേഹത്തിന്റെ വിശ്വസ്ത അണികളെല്ലാം കൂട്ടത്തോടെ ‘ഇവരാരുമല്ല’ (നൺ ഓഫ് ദീസ് കാൻഡിഡേറ്റ്സ്) എന്ന ഇന്ത്യയിലെ ‘നോട്ട’യ്ക്കു സമാനമായ ബാലറ്റ് കളം മാർക്ക് ചെയ്തതോടെയാണ് നിക്കി പിന്തള്ളപ്പെട്ടത്. 86 ശതമാനം വോട്ടുകൾ എണ്ണിക്കഴിഞ്ഞപ്പോൾ 63 ശതമാനം വോട്ടാണ് ‘നൺ ഓഫ് ദീസ് കാൻഡിഡേറ്റ്സ്’ നേടിയത്. ഇന്ത്യൻ വംശജയും മുൻ യുഎൻ അംബാസഡറുമായ നിക്കിക്ക് 30.8 ശതമാനം‌ വോട്ടാണ് ലഭിച്ചത്.