ഒൻ്റാറിയോയിലെ ഏറ്റവും പുതിയ പ്രൊവിൻഷ്യൽ പാർക്ക് കാനഡ ദിനത്തിൽ പൊതുജനങ്ങൾക്ക് സൗജന്യമായി തുറന്നുകൊടുക്കും. 2023 ലെ ബജറ്റിൽ പ്രഖ്യാപിച്ചതുപോലെ, ഡർഹാം റീജിയണിലെ ഉക്‌സ്ബ്രിഡ്ജിൽ പുതിയ അർബൻ പ്രൊവിൻഷ്യൽ പാർക്ക് നിർമ്മിക്കുന്നതിൻ്റെ പ്രാരംഭ ഘട്ടത്തിലാണ് സർക്കാർ.
ഇതുവരെ ഏകദേശം 19 ദശലക്ഷം ഡോളർ പദ്ധതിക്കായി നീക്കിവച്ചിട്ടുണ്ട്. ആളുകൾ താമസിക്കുന്ന സ്ഥലത്തോട് ചേർന്ന് പ്രവിശ്യാ പാർക്കുകൾ നിർമ്മിക്കാനുള്ള വിപുലമായ പദ്ധതിയുടെ ഭാഗമാണിതെന്ന് സർക്കാർ പറയുന്നു. ‍‍ടൊറന്റോ ന​ഗരത്തിൽ നിന്ന് ഏകദേശം 50 കിലോമീറ്റർ വടക്കുകിഴക്കായാണ് പാർക്ക് സ്ഥിതിചെയ്യുന്നത്.
ഒൻ്റാറിയോയിലെ വർദ്ധിച്ചുവരുന്ന ജനസംഖ്യയുടെ 83 ശതമാനവും നഗര കേന്ദ്രങ്ങളിൽ സ്ഥിതി ചെയ്യുന്നതിനാൽ, വീടിനോട് ചേർന്ന് കൂടുതൽ പ്രൊവിൻഷ്യൽ പാർക്കുകൾ നിർമ്മിക്കേണ്ടത് അത്യന്താപേക്ഷിതമാണെന്ന് പരിസ്ഥിതി സംരക്ഷണ മന്ത്രി ആൻഡ്രിയ ഖാൻജിൻ പറഞ്ഞു. അക്സ്ബ്രിഡ്ജ് അർബൻ പ്രൊവിൻഷ്യൽ പാർക്ക് സ്ഥാപിക്കുന്നത് നമ്മുടെ പാർക്ക് സംവിധാനം വിപുലീകരിക്കാനുള്ള ഞങ്ങളുടെ ഗവൺമെൻ്റിൻ്റെ പ്രതിബദ്ധതയിൽ സുപ്രധാന ചുവടുവെപ്പാണ്. ഭാവി തലമുറകൾക്കായി ഹരിത ഇടങ്ങൾ സംരക്ഷിക്കുന്നതിനും വികസിപ്പിക്കുന്നതിനും ഞങ്ങളുടെ പങ്കാളികളുമായി പ്രവർത്തിക്കാൻ ഞാൻ ആഗ്രഹിക്കുന്നതായും അവർ പറഞ്ഞു.