മുഖ്യമന്ത്രി പിണറായി വിജയനും സിപിഎമ്മിനെതിരെയും രൂക്ഷ വിമര്ശനവുമായി നിലമ്പൂർ എംഎൽഎ പിവി അൻവര്. പരസ്യപ്രസ്താവന പാടില്ലെന്ന പാര്ട്ടി നിര്ദേശം ലംഘിച്ചുകൊണ്ട് നിലമ്പൂര് ഗസ്റ്റ് ഹൗസിൽ നടത്തിയ വാര്ത്താസമ്മേളനത്തിലാണ് അൻവർ യുദ്ധപ്രഖ്യാപനം നടത്തിയത്.
പിണറായി വിജയനെ കണ്ടത് അച്ഛന്റെ സ്ഥാനത്താണ് എന്നിട്ടും അദ്ദേഹം എന്നെ ചതിച്ചെന്ന് അന്വര് വാര്ത്താസമ്മേളനത്തില് തുറന്നടിച്ചു. പിണറായി വിജയന് എന്ന സൂര്യൻ കെട്ടുപോയി, മുഖ്യമന്ത്രിയുടെ ഗ്രാഫ് നൂറില് നിന്ന് പൂജ്യത്തിലേക്കായി അന്വര് വിമര്ശിച്ചു. കമ്മ്യൂണിസ്റ്റ് പാർട്ടിയിൽ അടിമത്തമാണ്, അന്വര് വിമർശിച്ചു.
പി.ശശി കാട്ടുക്കള്ളനാണ്. കാട്ടു കള്ളനെ താഴെ ഇറക്കണമെന്ന് ഞാൻ നിശ്ചയിച്ചു. തെളിവ് നൽകിയിട്ടും വിജിലൻസ് അന്വേഷണത്തിന് 6 മാസം സമയം നൽകി. സ്പോട്ടിൽ സസ്പെൻഡ് ചെയ്യേണ്ട ആളാണ് എഡിജിപി അജിത്ത് കുമാർ, അൻവർ പറഞ്ഞു.
188ഓളം സ്വര്ണക്കടത്ത് കേസുകളാണ് കരിപ്പൂര് പൊലീസ് രജിസ്റ്റര് ചെയ്തത്. ഈ 188 കേസുകളില് 28 പേരെങ്കിലും ബന്ധപ്പെട്ടാൽ സത്യാവസ്ഥ പുറത്തുവരും. സ്വർണ്ണ കടത്തലും പൊട്ടിക്കലുമായി ബന്ധപ്പെട്ട എല്ലാ കാര്യങ്ങളും പൊലീസ് അന്വേഷിച്ചാല് കൃത്യമായി വിവരം കിട്ടും, അദ്ദേഹം പറഞ്ഞു. എന്നാൽ ഈ നിമിഷം വരെ അത്തരമൊരു അന്വേഷണം നടന്നിട്ടില്ല.
തന്റെ ആരോപണങ്ങളിൽ മുഖ്യമന്ത്രി നടത്തിയ പ്രതികരണത്തെയും പിവി അൻവര് പരിഹസിച്ചു. സ്വര്ണം പൊട്ടിക്കല് ആരോപണത്തില് മുഖ്യമന്ത്രി നല്കിയ മറുപടി വലിയ ചിരിയായിരുന്നു. കള്ളക്കടത്തുകാരെ മഹത്വവത്കരിക്കരിക്കാനുള്ള ശ്രമമാണ് താൻ നടത്തുന്നതെന്നാണ് മുഖ്യമന്ത്രി പറയാതെ പറഞ്ഞത്. അത്രത്തോളം അദ്ദേഹം കടന്ന് പറയേണ്ടിയിരുന്നില്ലെന്നും പിവി അൻവര് പറഞ്ഞു.
“മാധ്യമ പ്രവർത്തകരുടെ ചോദ്യത്തോട് മുഖ്യമന്ത്രി പ്രതികരിച്ച രീതി തെറ്റാണ്, മുഖ്യമന്ത്രിയെ പാർട്ടിയും തിരുത്തിയില്ല. തന്നെ കള്ളകടത്തകാരുടെ ആളായി ചിത്രീകരിച്ചു. മുഖ്യമന്ത്രിയുടെ പ്രസ്താവന കടന്നുപോയി. മുഖ്യമന്ത്രിയുടെ പ്രസ്താവന തനിക്ക് വലിയ ഡാമേജ് ഉണ്ടാക്കി. ഇപ്പോഴും പാർട്ടിയെ തള്ളിപ്പറയാനില്ല. പാർട്ടി പ്രവർത്തകർക്ക് ഒപ്പമാണ് താൻ. അജിത്ത് കുമാർ പറഞ്ഞ രീതിയിലാണ് മുഖ്യമന്ത്രി വാർത്ത സമ്മേളനം നടത്തിയത്. എ.ഡി.ജി.പി എം ആർ അജിത്ത് കുമാർ എഴുതി കൊടുക്കുന്നതാണ് മുഖ്യമന്ത്രി വായിക്കുന്നത്” പിവി അൻവർ ആഞ്ഞടിച്ചു.
പോലീസ് തന്റെ പിന്നാലെയുണ്ട് ഇന്ന് വാര്ത്താസമ്മേളനം നടത്താൻ കഴിയുമെന്ന് പോലും വിചാരിച്ചതല്ല. ഇന്ന് പുലര്ച്ചെ രണ്ടു മണിവരെ ഉറങ്ങിയിട്ടില്ല. ഇന്നലെ രാത്രിയും പൊലീസ് തന്റെ വീട്ടിലെത്തി. ഇനി പ്രതീക്ഷ കോടതിയിലാണെ്. കൃത്യമായ അന്വേഷണം നടക്കാൻ ഇനി ഹൈക്കോടതിയെ സമീപിക്കും, സ്വര്ണ കടത്തുമായി ബന്ധപ്പെട്ട വീഡിയോയും വാര്ത്താസമ്മേളനത്തിനിടെ പിവി അൻവര് പ്രദര്ശിപ്പിച്ചു.
