ചാറ്റ് ജിടിപിയിൽ ഇന്ന് വരാനിരിക്കുന്ന മാജിക്ക് ഫീച്ചറുകൾക്കായി കാത്തിരിക്കുകയാണ് സൈബർ ലോകം. ഗൂഗിൾ സെർച്ച് എഞ്ചിനെയും മറികടക്കുന്ന എന്തോ ഒന്ന് വരുന്നു എന്നായിരുന്നു ആദ്യ ഘട്ടം ചർച്ചകൾ. പുതിയ ഫീച്ചറുകൾ ഇന്ന് രാത്രി അവതരിപ്പിക്കും എന്നാണ് ഓപ്പൺ എഐ വ്യക്തമാക്കിയിരിക്കുന്നത്.
എക്സ് അക്കൗണ്ടിലൂടെയാണ് ഓപ്പൺ എഐ ഇക്കാര്യം അറിയിച്ചത്. ഓപ്പൺ എഐ മേധാവി സാം ഓൾട്ട്മാൻ പക്ഷെ ഇത് സ്ഥിരീകരിച്ചില്ല. സെർച്ച് എഞ്ചിൻ അതിന്റെ വഴിയിൽ തുടരട്ടെ ഇത് അതിലും വലിയ ലക്ഷ്യത്തിലേക്കാണ് എന്നാണ് അദ്ദേഹം നൽകുന്ന സൂചന.’ചില മാജിക്ക് ആയി തോന്നുന്ന പുതിയ ഫീച്ചറുകൾ. ഇന്ന് രാത്രി 10.30 നാണ് പ്രഖ്യാപനം നടക്കുക. എന്നാണ് എക്‌സിൽ കുറിച്ചത്’.
നിലവിൽ 2023 ഡിസംബർ വരെയുള്ള വിവരങ്ങളാണ് ചാറ്റ് ജിപിടി നൽകുക. ചാറ്റ് ജിപിടിയിൽ വെബ് പേജുകൾ കൂടി ലഭ്യമാക്കുന്നതിനുള്ള സൗകര്യം അവതരിപ്പിച്ചേക്കുമെന്ന് നേരത്തെ സൂചനയുണ്ടായിരുന്നു. ഇത് കൂടുതൽ തത്സമയ വിവരങ്ങൾ നൽകാൻ ചാറ്റ് ജിപിടിയെ പ്രാപ്തമാക്കും.
ചൊവ്വാഴ്ച ഗൂഗിൾ ഐ/ഒ ഡവലപ്പർ കോൺഫറൻസ് നടക്കാനിരിക്കെയാണ് മണിക്കൂറുകൾക്ക് മുമ്പ് ഓപ്പൺ എഐ പുതിയ ഫീച്ചറുകളുടെ പ്രഖ്യാപനത്തിന് ഒരുങ്ങുന്നത്. ഈ സാഹചര്യത്തിലാണ് ഗൂഗിളിനെ വെല്ലുവിളിക്കുന്ന എന്തെങ്കിലും ഓപ്പൺ എഐയുടെ പ്രഖ്യാപനത്തിലുണ്ടാകുമെന്ന കാത്തിരിപ്പ്. അക്കൌണ്ട് ഇല്ലാതെയും ചാറ്റ് ജി പി ടി ഉപയോഗിക്കാവുന്ന സംവിധാനം നിലവിൽ വന്നു കഴിഞ്ഞിട്ടുണ്ട്.