കള്ളപ്പണം വെളുപ്പിക്കുന്നതിനായി കുറ്റവാളികളെ സഹായിക്കുന്നതിൽ കാനഡയിലെ ഒരു വിഭാഗം നിയമജ്ഞർക്ക് നിർണായക പങ്കുണ്ടെന്ന് സൂചിപ്പിക്കുന്ന ഇന്റലിജൻസ് റിപ്പോർട്ട് പുറത്ത്. 2022 ൽ തയ്യാറാക്കിയ റിപ്പോർട്ട് സിടിവി ന്യൂസും ഇൻവെസ്റ്റിഗേറ്റീവ് ജേണലിസം ഫൗണ്ടേഷനും ചേർന്നാണ് നിലവിൽ പുറത്തു കൊണ്ടുവന്നത്. അന്താരാഷ്ട്ര ക്രിമിനൽ സംഘടനകൾ, മയക്കുമരുന്ന് കടത്തുന്നവർ, നിയമവിരുദ്ധമായ ചൂതാട്ട സംഘങ്ങൾ, റിയൽ എസ്റ്റേറ്റ്, ആഡംബര കാറുകൾ എന്നിവയിലൂടെ കള്ളപ്പണം വെളുപ്പിക്കുന്ന കുറ്റവാളികൾ എന്നിവരുമായി ചില നിയമജ്ഞർക്ക് ബന്ധമുണ്ടെന്ന് ഫിനാൻഷ്യൽ ട്രാൻസാക്ഷൻസ് ആൻഡ് റിപ്പോർട്ട് അനാലിസിസ് സെന്റർ (ഫിൻട്രാക്ക്) കണ്ടെത്തിയതായാണ് റിപ്പോർട്ട് പറയുന്നത്.
” സംശയാസ്പദമായ നിരവധി പ്രവർത്തനങ്ങളിൽ ” കനേഡിയൻ ലീഗൽ പ്രൊഫഷണലുകളും സ്ഥാപനങ്ങളും ഉൾപ്പെട്ടതായി റിപ്പോർട്ട് കൃത്യമായി ചൂണ്ടിക്കാട്ടുന്നുണ്ട്. ഇത്തരം നിയമവിരുദ്ധ ഗ്രൂപ്പുകളുമായി 2017 മുതൽ 2020 വരെയുള്ള കാലയളവിൽ 22 ബില്യൺ ഡോളറിന്റെ ഇടപാടുകൾ നടന്നിട്ടുണ്ട് എന്നാണ് സൂചിപ്പിക്കുന്നത്. 2017 മുതൽ 2021 വരെയുള്ള വർഷങ്ങളിൽ കള്ളപ്പണം വെളുപ്പിക്കൽ ടെററിസ്റ്റ് ഫിനാൻസിംഗ് എന്നിവ സംശയിക്കപ്പെട്ട 229 കേസുകളാണ് പോലീസിനും ദേശീയ സുരക്ഷ ഏജൻസികൾക്കും ഫിൻട്രാക്ക് അയച്ചത്.