കാനഡയിലേക്കുള്ള ഉയർന്ന തോതിലുള്ള കുടിയേറ്റത്തിനുള്ള പിന്തുണ സമീപ മാസങ്ങളിൽ കുത്തനെ കുറഞ്ഞതായി സർ‌വേ. നാനോസ്, എൻവയോണിക്സ് ഇൻസ്റ്റിറ്റ്യൂട്ട്, കനേഡിയൻ മാർക്കറ്റ് റിസർച്ച് കമ്പനിയായ ലെഗർ എന്നിവർ നടത്തിയ സർവേയിലാണ് കണ്ടെത്തൽ.

ദ്രുതഗതിയിലുള്ള ജനസംഖ്യാ വർദ്ധന, വർദ്ധിച്ചുവരുന്ന കുടിയേറ്റത്തിന്റെ തോത് കാനഡയിലെ ഉയർന്ന ജീവിതച്ചെലവും പ്രത്യേകിച്ച് ഭവന പ്രതിസന്ധി എന്നിവ ചില കനേഡിയൻമാരെ ആശങ്കപ്പെടുത്തുന്നതായും സർവേ കണ്ടെത്തി. രാജ്യത്തെ വർദ്ധിച്ചുവരുന്ന ജനസംഖ്യയ്ക്ക് ഏറ്റവും വലിയ സംഭാവന നൽകുന്ന ഘടകമാണ് കുടിയേറ്റം. കാനഡയിലെ ജനസംഖ്യ 2023-ൽ 40,000,000-ത്തിലധികം ആളുകളുടെ നാഴികക്കല്ല് പിന്നിട്ടു. 2024-ൽ 485,000 പുതിയ സ്ഥിര താമസക്കാരെയും 2025-ലും 2026-ലും 500,000-ഉം കാനഡ പ്രതീക്ഷിക്കുന്നു.

എന്നാൽ ഇമിഗ്രേഷൻ റെഫ്യൂജീസ് ആൻഡ് സിറ്റിസൺഷിപ്പ് കാനഡയുടെ (IRCC) 2022 ലെഇമിഗ്രേഷൻ റിപ്പോർട്ടിൽ കാനഡയുടെ തൊഴിൽ ശക്തിയുടെ 90% വളർച്ചയ്ക്കും കാരണം കുടിയേറ്റമാണെന്ന് പറയുന്നു. കുടിയേറ്റക്കാരുടെ എണ്ണം കൂടിയില്ലെങ്കിൽ, 2030-ഓടെ വിരമിക്കുമെന്ന് പ്രതീക്ഷിക്കുന്ന ഒമ്പത് ദശലക്ഷം കനേഡിയൻമാരുടെ ഒഴിവുകൾ നികത്തുന്നത് ബുദ്ധിമുട്ടാണെന്നും റിപ്പോർട്ട് പറയുന്നു. ഏറ്റവും പുതിയ ഇമിഗ്രേഷൻ ലെവൽ പ്ലാൻ സുസ്ഥിരമാണെന്നും സമ്പദ്‌വ്യവസ്ഥയെ പിന്തുണയ്ക്കുന്നുവെന്നും ആരോഗ്യസംരക്ഷണ സംവിധാനത്തിലും ഭവനനിർമ്മാണത്തിലും അനുഭവപ്പെടുന്ന സമ്മർദ്ദം ഒഴിവാക്കുമെന്നും IRCC പറയുന്നു. രാജ്യത്തെ സമ്പദ്‌വ്യവസ്ഥയെ ശക്തമായി നിലനിർത്താൻ പുതുമുഖങ്ങളുടെ ആവശ്യം ഉണ്ടായിരുന്നിട്ടും, ഉയർന്ന ജീവിതച്ചെലവും ഉയർന്ന പണപ്പെരുപ്പവും താങ്ങാനാവുന്ന താമസസ്ഥലം കണ്ടെത്താനുള്ള ബുദ്ധിമുട്ടും നേരിടുന്ന കനേഡിയൻമാർക്കിടയിൽ കുടിയേറ്റത്തെക്കുറിച്ച് വർദ്ധിച്ചുവരുന്ന ആശങ്കയുണ്ടെന്ന് ലെഗർ, എൻവയോണിക്‌സ്, നാനോസ് എന്നിവയെല്ലാം കണ്ടെത്തി.