ടൊറന്റോയിൽ വെള്ളിയാഴ്ച 86 വർഷത്തെ കാലാവസ്ഥാ റെക്കോർഡ് തകർത്തു. ഫെബ്രുവരിയിൽ താപനില 13 ഡിഗ്രി സെൽഷ്യസിനു മുകളിൽ ഉയർന്നു. എൺവയോൺമെന്റ് കാനഡയുടെ അനൗദ്യോഗിക റിപ്പോർട്ട് പ്രകാരം, ടൊറന്റോ പിയേഴ്സൺ അന്താരാഷ്ട്ര വിമാനത്താവളത്തിലെ താപനില രാവിലെ 10 മണിക്ക് 11.4 ഡിഗ്രി സെൽഷ്യസായിരുന്നതായും ഇത് 1938-ൽ രേഖപ്പെടുത്തിയ 10.6 ഡിഗ്രി സെൽഷ്യസിന്റെ റെക്കോർഡ് മറികടന്നതായും റിപ്പോർട്ട് പറയുന്നു. കൂടാതെ, ഉച്ചയ്ക്ക് 12 മണിക്ക് താപനില 13.4 ഡിഗ്രി സെൽഷ്യസിലെത്തി, വൈകുന്നേരം 4 മണിക്ക് പരമാവധി 14 ഡിഗ്രി സെൽഷ്യസിലെത്തുമെന്ന് പ്രതീക്ഷിക്കുന്നു. രാത്രിയിൽ പതിനൊന്നോടെ താപനില 10 ഡിഗ്രി സെൽഷ്യസിലേക്ക് കുറയുമെന്നും റിപ്പോർട്ട് പറയുന്നു.
ശനിയാഴ്ച പ്രധാനമായും മേഘാവൃതമായിരിക്കും, രാവിലെയും ഉച്ചയോടെയും മഴ പെയ്യാനും ഉയർന്ന 10 ഡി​ഗ്രി സെൽഷ്യസ് വരെ ഉയരാനും സാധ്യതയുണ്ട്. അടുത്ത ആഴ്‌ചയുടെ തുടക്കത്തിൽ ഒറ്റപ്പെട്ട കൊടുങ്കാറ്റുകൾക്ക് സാധ്യതയുള്ളതിനാൽ ഞായറാഴ്ച താപനില 3 ഡി​ഗ്രി സെൽഷ്യസിലെത്തുമെന്നും റിപ്പോർട്ട് പറയുന്നു.
ഇതുവരെ, ടൊറൻ്റോയിലെ ശൈത്യകാലം താരതമ്യേന സൗമ്യമായിരുന്നു, ഈ സീസണിൽ നഗരത്തിലെ ഏറ്റവും വലിയ മഞ്ഞുവീഴ്ച 5.6 സെൻ്റീമീറ്റർ മാത്രമാണെന്ന് എൺവയോൺമെൻ്റ് കാനഡയിലെ മുതിർന്ന കാലാവസ്ഥാ ശാസ്ത്രജ്ഞനായ ഡേവ് ഫിലിപ്സ് പറഞ്ഞു.