ടൊറൻ്റോ: കെയർ ഹോം നിവാസികൾ ഉൾപ്പെടെ ഏറ്റവും ദുർബലരായ ആളുകൾക്ക് ഒക്ടോബർ അവസാനത്തോടെ ഫ്ലൂ വാക്സിൻ ലഭ്യമാകുമെന്ന് ഒൻ്റാറിയോ. കോവിഡ്-19, ഫ്ലൂ വാക്സിനും ഒരേ സമയം സ്വീകരിക്കുന്നത് സുരക്ഷിതവും സൗകര്യപ്രദവുമാണെന്ന് ആരോഗ്യ മന്ത്രാലയം പറയുന്നു.
ഏകദേശം ഒരേ സമയത്ത് തന്നെ ഫ്ലൂ വാക്സിനുകൾ കെയർ ഹോമുകളിലെ താമസക്കാർക്കും ജീവനക്കാർക്കും ആശുപത്രിയിലെ രോ​ഗികൾക്കും ആശുപത്രി ജീവനക്കാർക്കും, തുടർന്ന് റിട്ടയർമെൻ്റ് ഹോമുകളിലെയും മറ്റ് കോൺഗ്രഗേറ്റ് ക്രമീകരണങ്ങളിലെയും 65 വയസും അതിൽ മുകളിലുള്ള ആളുകൾക്കും ലഭ്യമാക്കും.
പ്രൈമറി കെയർ ഓഫീസുകളിലും ഫാർമസികളിലും ചില പൊതുജനാരോഗ്യ യൂണിറ്റുകളിലും 2024 ഒക്ടോബർ 28 മുതൽ പൊതുജനങ്ങൾക്ക് സൗജന്യ ഫ്ലൂ വാക്സിനുകൾ ലഭ്യമാകുമെന്ന് മന്ത്രാലയം അറിയിച്ചു. ശിശുക്കൾക്കും 24 മാസം വരെ പ്രായമുള്ള ഉയർന്ന അപകടസാധ്യതയുള്ള കുട്ടികൾക്കും ദീർഘകാല പരിചരണ കേന്ദ്രങ്ങളിലെയും റിട്ടയർമെൻ്റ് ഹോമുകളിലെയും താമസക്കാർ ഉൾപ്പെടെയുള്ള യോഗ്യരായ ആളുകൾക്ക് റെസ്പിറേറ്ററി സിൻസിറ്റിയൽ വൈറസ് വാക്സിനുകളും ഒക്ടോബറിൽ സൗജന്യമായി ലഭ്യമാകും.
വില്ലൻ ചുമ കേസുകൾ അടുത്തിടെ വർധിച്ചുവരുന്ന സാഹചര്യത്തിലാണ് പ്രതിരോധ കുത്തിവയ്പ്പുകളെ സംബന്ധിച്ച് അറിയേണ്ടത് പ്രധാനമാണെന്ന് ചീഫ് മെഡിക്കൽ ഓഫീസർ ഓഫ് ഹെൽത്ത് ഡോ. കീരൻ മൂർ പറഞ്ഞു.