സാക്ഷരതാ മിഷന് നടത്തുന്ന ഏഴാം ക്ലാസ് തുല്യതാ പരീക്ഷ എഴുതാൻ നടൻ ഇന്ദ്രൻസ്. തിരുവനന്തപുരം അട്ടക്കുളങ്ങരയിലെ സെന്ട്രല് സ്കൂളില് വച്ചാണ് നടൻ പരീക്ഷ എഴുതുന്നത്. നടന് അഭിനന്ദനങ്ങൾ അറിയിച്ച് മന്ത്രി ശിവൻകുട്ടി രംഗത്ത് എത്തിയിട്ടുണ്ട്.
പത്താംക്ലാസ് തുല്യത നേടുക എന്നതാണ് ഇന്ദ്രൻസിന്റെ ലക്ഷ്യം. ഏഴാംക്ലാസ് ജയിച്ചാലേ പത്തിൽ പഠിക്കാനാവൂ എന്ന സാക്ഷരതാമിഷന്റെ ചട്ടപ്രകാരം ആണ് താരം ഇപ്പോൾ പരീക്ഷ എഴുതുന്നത്. നവകേരളസദസ്സിന്റെ ചടങ്ങിൽ പങ്കെടുക്കവേയാണ് തുടർപഠനത്തിന് ഇന്ദ്രൻസ് താത്പര്യം അറിയിച്ചതും പത്താംക്ലാസിലേക്കുള്ള അപേക്ഷ കൈമാറിയതും. നാലാംക്ലാസുവരെയേ പഠിച്ചിട്ടുള്ളൂ എന്നാണ് ഓർമയെന്ന് അദ്ദേഹം പറഞ്ഞിരുന്നെങ്കിലും ഏഴുവരെ പോയിട്ടുണ്ടെന്നാണ് കിട്ടിയ വിവരമെന്ന് ഇന്ദ്രൻസിൻ്റെ സഹപാഠികളെ സാക്ഷ്യപ്പെടുത്തി സാക്ഷരതാമിഷൻ പറഞ്ഞിരുന്നു.
‘സംസ്ഥാന സാക്ഷരതാമിഷന്റെ നേതൃത്വത്തിൽ നടത്തുന്ന ഏഴാംതരം തുല്യതാപരീക്ഷയെഴുതാൻ നടൻ ശ്രീ. ഇന്ദ്രൻസ് തിരുവനന്തപുരം അട്ടക്കുളങ്ങര സ്കൂളിൽ എത്തിയപ്പോൾ..
അഭിനന്ദനങ്ങൾ ശ്രീ. ഇന്ദ്രൻസ്’ എന്ന അടിക്കുറിപ്പിൽ ഇന്ദ്രൻസിൻ്റെ ചിത്രം വിദ്യാഭ്യാസ മന്ത്രി വി ശിവൻകുട്ടി പങ്കുവെച്ചിരുന്നു. സ്കൂളില് പോകാന് പുസ്തകവും വസ്ത്രവും ഇല്ല എന്ന അവസ്ഥയിലാണ് താന് സ്കൂള് വിദ്യാഭ്യാസം നിര്ത്തി തയ്യല് ജോലിയിലേക്ക് എത്തിയത് എന്നാണ് ഇന്ദ്രന്സ് മുന്പ് പറഞ്ഞത്. എന്നാല് വായന ശീലം വിടാത്തതിനാല് കുറേ കാര്യങ്ങള് മനസിലാക്കാന് സാധിച്ചു. അത് വലിയ മാറ്റങ്ങള് ജീവിതത്തിലുണ്ടാക്കിയെന്നും ഇന്ദ്രന്സ് പറഞ്ഞിരുന്നു.
ഒട്ടേറെ ചിത്രങ്ങളിലൂടെ പുരസ്കാരങ്ങളും പ്രേക്ഷക പ്രശംസയും നേടിയ അദ്ദേഹം ഇന്നും സിനിമകളിൽ സജീവമാണ്.
