കാലിഫോര്ണിയയിലും ലോസ് ഏഞ്ചല്സിലും നിരവധി പേരുടെ മരണത്തിനും പതിനായിരക്കണക്കിന് പേരുടെ താമസസ്ഥലങ്ങളും കെട്ടിടങ്ങളും കത്തിച്ചാമ്പലാക്കിയ തീപിടിത്തം ഒരാഴ്ചയായിട്ടും നിയന്ത്രണ വിധേയമായിട്ടില്ല. അമേരിക്കയ്ക്ക് ആവശ്യത്തിന് വെള്ളമില്ലാത്തതും, തീപിടിച്ച പ്രദേശങ്ങളില് വെള്ളം എത്തിക്കാനുള്ള പരിമിതിയുമാണ് നാശനഷ്ടങ്ങള് ഇത്ര ഭീകരമാക്കിയത്. ഇപ്പോള് വാക്കുത്തര്ക്കങ്ങള് മറന്ന് അമേരിക്കയുടെ സഹായത്തിന് എത്തിയിരിക്കുകയാണ് കാനഡ. കാനഡയില് നിന്നുള്ള സൂപ്പര് സ്കൂപ്പറുകള് എന്നറിയപ്പെടുന്ന ആംഫിബിയസ് വിമാനം രക്ഷാപ്രവര്ത്തനത്തിനെത്തിയിട്ടുണ്ട്. കാട്ടുതീ കെടുത്താന് പ്രത്യേകം രൂപകല്പ്പന ചെയ്ത CL-415 വിമാനത്തിന് വെള്ളം കോരിയെടുക്കാനും അഗ്നിബാധിത പ്രദേശങ്ങളില് ശക്തമായി പമ്പ് ചെയ്യാനും സാധിക്കും.
സൂപ്പര് സ്കൂപ്പറുകള് vs എയര് ടാങ്കറുകള്
ബക്കറ്റുകളും എയര് ടാങ്കറുകളും ഘടിപ്പിച്ച ഹെലികോപ്റ്ററുകളേക്കാള് സൂപ്പര് സ്കൂപ്പറുകള് ഫലപ്രദമായ അഗ്നിശമന പരിഹാരമാണെന്ന് ദി വാഷിംഗ്ടണ് പോസ്റ്റിലെ റിപ്പോര്ട്ടില് പറയുന്നു. ഈ വിമാനങ്ങള്ക്ക് ഒറ്റയടിക്ക് 1,600 ഗാലന് വെള്ളം ശേഖരിക്കാന് കഴിയും. കൂടാതെ, എയര് ടാങ്കറുകളില് നിന്ന് വ്യത്യസ്തമായി, വെള്ളം ശേഖരിക്കാന് സൂപ്പര് സ്കൂപ്പറുകള് ഇറങ്ങേണ്ടതില്ല. അവര്ക്ക് 160 കിലോമീറ്റര് പരിധിയില് അടുത്തുള്ള ഏത് ജലാശയത്തിന്റെയും ഉപരിതലത്തിനടുത്തേയ്ക്ക് താഴ്ന്ന് പറന്ന് ഹോസ് ഉപയോഗിച്ച് വെള്ളം നിറയ്ക്കാനും തീപിടിച്ച സ്ഥലത്തേയ്ക്ക് പെട്ടെന്ന് എത്തി വെള്ളം ഒഴിക്കാനും സാധിക്കും.
സൂപ്പര് സ്കൂപ്പറിന് 93 അടി ചിറകുകളും 65 അടി നീളവുമുണ്ട്. കൂടുതല് ഫലപ്രദമായ അഗ്നിശമനത്തിനായി വെള്ളം പെട്ടെന്ന് നിറയ്ക്കാന് കഴിയുന്ന ഒരു സംവിധാനമുണ്ട്. ടാങ്ക് നിറയാന് ഏകദേശം 12 സെക്കന്ഡ് എടുക്കും. ഹോസുകള് ഉപയോഗിച്ച് ഒരു സൂപ്പര് സ്കൂപ്പര് വാട്ടര് ടാങ്ക് നിറയ്ക്കാം. നിറഞ്ഞു കഴിഞ്ഞാല്, മണിക്കൂറില് 350 കിലോമീറ്റര് വേഗതയില് വിമാനത്തിന് അഗ്നിബാധിത പ്രദേശത്തേക്ക് പറക്കാന് കഴിയും. അതേസമയം, കാട്ടുതീയിലകപ്പെട്ട് 29 പേര് മരിക്കുകയും 12,000-ത്തിലധികം കെട്ടിടങ്ങള് നശിപ്പിക്കപ്പെടുകയും ചെയ്തിട്ടുണ്ട്. ഒരു ലക്ഷത്തിലധികം ആളുകള് ദുരന്തപ്രദേശത്ത് നിന്ന് പലായനം ചെയ്യുകയും ചെയ്തു.
