കുവൈറ്റിലെ തൊഴിലാളി ക്യാമ്പിലുണ്ടായ തീപിടിത്തത്തിൽ ഇതുവരെ മലയാളികൾ ഉൾപ്പെടെ 49 പേർ മരിച്ചതായാണ് പുതിയ കണക്ക്. നിരവധി പേർക്കാണ് പരിക്കേറ്റത്. പരിക്കേറ്റവരെ രാജ്യത്തെ വിവിധ ആശുപത്രികളിലായി പ്രവേശിപ്പിച്ചു. മംഗഫിലുള്ള വ്യവസായ സ്ഥാപനത്തിലെ തൊഴിലാളി ക്യാമ്പിലാണ് അപകടമുണ്ടായത്. പുലര്‍ച്ചെ നാല് മണിയോടെ കെട്ടിടത്തില്‍ തീ ആളിപ്പടരുകയായിരുന്നു. കെട്ടിടത്തിൽ ഒരേ കമ്പനിയിലെ തൊഴിലാളികളായ 160 ഓളം പേർ താമസിച്ചിരുന്നതായി കുവൈത്ത് ടൈംസ് റിപ്പോർട്ട് ചെയ്യുന്നു. തീപിടിത്തത്തിൽ മരിച്ചവരുടെ എണ്ണം 49 ആയി. ഇതിൽ നിരവധി മലയാളികളും ഉൾപ്പെട്ടിട്ടുണ്ടെന്നാണ് വിവരം. 6 മലയാളികൾ അദാൻ ആശുപത്രിയിലെ ഐസിയുവിൽ കഴിയുന്നതായി ‌റിപ്പോർട്ടുകൾ പറയുന്നു.
ബുധനാഴ്ച മാരകമായ തീപിടിത്തമുണ്ടായ മംഗഫിലെ കെട്ടിടത്തിൻ്റെ ഉടമയെയും കെട്ടിടത്തിൻ്റെ കാവൽക്കാരനെയും തൊഴിലാളികളുടെ ഉത്തരവാദിത്തമുള്ള കമ്പനിയുടെ ഉടമയെയും പിടികൂടാൻ ആഭ്യന്തര മന്ത്രി ഷെയ്ഖ് ഫഹദ് അൽ യൂസുഫ് അൽ സബാഹ് പോലീസിന് ഉത്തരവിട്ടു. കമ്പനിയുടെയും കെട്ടിട ഉടമകളുടെയും അത്യാഗ്രഹത്തിൻ്റെ ഫലമാണ് മംഗഫ് ദുരന്തമെന്ന് ആഭ്യന്തര മന്ത്രി പറഞ്ഞു.
തീപിടിത്തത്തിൻ്റെ കാരണം അന്വേഷിച്ചുവരികയാണെന്ന് അധികൃതർ അറിയിച്ചു. തൊഴിലാളികളുടെ പാർപ്പിടങ്ങളിലെ തിരക്ക് സംബന്ധിച്ച ആശങ്കകൾ ഒരു പോലീസ് ഉദ്യോഗസ്ഥൻ രേഖപ്പെടുത്തി. അത്തരം താമസസ്ഥലങ്ങളിൽ വളരെയധികം തൊഴിലാളികളെ തിക്കിത്തിരക്കുന്നതിനെതിരെ “ഞങ്ങൾ എപ്പോഴും ജാഗ്രത പുലർത്തുകയും മുന്നറിയിപ്പ് നൽകുകയും ചെയ്യുന്നു”, അദ്ദേഹം പറഞ്ഞു.
തീപിടിത്തത്തെ തുടർന്ന് 43 പേരെ ആശുപത്രിയിൽ പ്രവേശിപ്പിച്ചതായി കുവൈറ്റ് ആരോഗ്യ മന്ത്രാലയം റിപ്പോർട്ട് ചെയ്തു. ഇതിൽ നാല് പേർ മരിച്ചു. 41 മരണങ്ങളുടെ പ്രാഥമിക പോലീസ് കണക്കിൽ ആ മരണങ്ങൾ ഉൾപ്പെടുത്തിയിട്ടുണ്ടോ എന്ന് വ്യക്തമല്ല.