മലപ്പുറം: കോഴിക്കോട് സ്വകാര്യ ആശുപത്രിയില് ചികിത്സയിലുള്ള മലപ്പുറം സ്വദേശിയായ പതിനാലുകാരന് നിപ സ്ഥിരീകരിച്ചു. കോഴിക്കോട് വൈറോളജി ലാബില് നടത്തിയ പരിശോധനയിലും പുണെ വൈറോളജി ഇന്സ്റ്റിറ്റ്യൂട്ടിലെ പരിശോധനയിലുമാണ് നിപ സ്ഥിരീകരിച്ചതെന്ന് ആരോഗ്യ മന്ത്രി വീണാ ജോര്ജ് വ്യക്തമാക്കി.
മലപ്പുറത്തെ പാണ്ടിക്കാട് പഞ്ചായത്തിലെ ചെമ്പ്രശ്ശേരി സ്വദേശിയായ പതിനാലുകാരനാണ് ചികിത്സയിലുള്ളത്. കുട്ടിയുടെ ആരോഗ്യനില അതീവ ഗുരുതരമാണ്. ബന്ധുക്കള് ആവശ്യപ്പെട്ടതിനെ തുടര്ന്ന് സ്വകാര്യ ആശുപത്രിയില് നിന്ന് കുട്ടിയെ കോഴിക്കോട് മെഡിക്കല് കോളേജിലേക്ക് മാറ്റുമെന്നും മന്ത്രി വ്യക്തമാക്കി.
ജില്ലയില് ജാഗ്രതാ നിര്ദേശം നല്കിയിട്ടുണ്ടെന്നും നിലവില് പ്രോട്ടോകോള് പ്രകാരം പ്രതിരോധ നടപടികള് സ്വീകരിച്ചിട്ടുണ്ടെന്നും മന്ത്രി കൂട്ടിച്ചേര്ത്തു. കുട്ടിയുടെ വീടിന് മൂന്ന് കിലോമീറ്റര് ചുറ്റളവിലാണ് ജാഗ്രതാ നിര്ദേശം. ആരോഗ്യവകുപ്പ് മലപ്പുറത്ത് കണ്ട്രോള് റൂമും തുറന്നിട്ടുണ്ട്.
2018 മുതല് ഇതുവരെയുള്ള കാലയളവില് നാല് തവണയാണ് കേരളത്തില് നിപ വൈറസ് ബാധ സ്ഥിരീകരിച്ചത്.
കേരളത്തിൽ വീണ്ടും നിപ; മലപ്പുറത്തെ 14-കാരന് രോഗം സ്ഥിരീകരിച്ചു
Reading Time: < 1 minute
